شرح عملية صيانة فك وتنظيف وتركيب كربراتير السيارة بالصور

شرح عملية صيانة فك وتنظيف وتركيب كربراتير السيارة بالصور

شرح وتصوير وتنفيذ :

1-  م / أحمد عصمت            2- م / أدهم حسام         3- م / محمد حسين

__________________________________________________

بسم الله الرحمن الرحيم

الناهرده هشرحلكو عمليه صيانه وتنظيف الكربراتير بدون اللجوء لمتخصص مع عمل الصيانه الدوريه للعربيه كتغيير ابلاتين وكندنسر وبوجيهات وفلتر هواء وفلتر بنزين .

هنبدأ بشرح فك وتنظيف الكربراتير بالكامل وهنحتاج فيه طبعاً منظف كربراتير + بنزين + طبق ( طشط ) عشان نغسل فيه + فرشاه اسنان قديمة .

 

أولاً بعد ما نفك الكربراتير من العربية هنبدا بتنظيف الجسم الخارجي قبل الفك عشان مفيش حاجه تعصلج معانا واحنا بنفك بعدين نحط الكربراتير في طبق كبير فيه بنزين عشان لما نفك كل حاجه تبقي جوا الطبق ومتضعش ، هتغسل الكربراتير كويس جداً من بره بالبنزين وفرشاه الاسنان ونشيل كل الجلخ اللى عليه .

بعد كده هنفك وش الكربيراتير من الخمس مسامير اللي فوق دول ونفصل دراع الشفاط زي اللي في الصوره عن جسم الكربراتير من تحت عن طريق مسمار عاده في ضهره سوسته نخلي بلنا من السوسته دي كويس عشان مهمه جدا .

كدا احنا فصلنا اول جزئين في الكربراتير نبدا نشتغل فيهم عن طريق تنظيف جميع المجاري والاخرام اللي في كل جزء طبعا بالاسبراي الخاص بالكربراتير وشرط اساسي لما احط شفاطه الاسبري في خرم وادوس لازم ينفد السائل من الجهه التانيه يعني لازم يكون في مخرج والا هنحتاج نستخدم فونيه او سلكه لتسليك المنافذ وطبعا انا محتجتش الكلام دا الحمد لله

هنبتدى نفك البيكات والرشاشات عشان ننضفهم وهنبدا برشاش الاكسراتير زي ما في الصور بيبقي مكون من جزئين جزا طبه بيقفل عليه بيتفك بمفك عاده عريض او بنسه وبنشيله بنلاقي الرشاش طلع بسرعه معانا طبعا كل دا هيضرب فيه الاسبراي في كل اتجاه .

دا الجزء الاولاني اللي بيتفك عشان الرشاش يطلع زي الصوره دي

وبعدين نفك بيك السرعه من حوض الكربيراتير زي الصوره وانا عملت تعديل بسيط غيرت البيك من 112 الي 117 عشان ازود سحب العربيه شويه وهوريكم البكين الجديد والقديم

بعد ما هنظف كويس بيك السرعه و اماكن بيك السرعه فى الكربراتير هننقل علي بيك الهواء اللي بيتكون من جزئين وبيتفك برده بمفك عاده الجزء اللي فوق ونقلب الكربراتير على ظهره عشان نسقط منه بيك الهواء زي الصور 

هنظف الجزئين الخاصين ببيك الهواء ونفس الكلام هنظف مكانهم في الكربراتير كويس جدا .

دخل بعد كده على بيك السلانسيه ...  بيك السلانسيه بيتفك لجزئين علي فكره يتنظف برضه بالاسبراى وبيتركب تانى

نبتدي نفك الجزء الثالث من الكربيراتير والخاص بقاعده الكربيراتير واللي فيها يعتبر اهم شغل في الكربيراتير وهقولكم ليه

طبعا بتتفك بسمارين عاده زي الصوره اللي فاتت وملحوظه مهمه جميع المجاري اللي في قاعده الكربراتير اللي باينه ومسوده في الصوره اللي فاتت بتتنظف كويس جدا وتتسلك

بضرب اسبراى كويس جدا في الاخرام دي ولازم الاسبراى ينفذ من الناحيه التانيه لان لو منفذش هنحتاج نسلك بفونيه 

في اللحظه دي هنتاكد من باب الكربيراتير اذا كان موارب مبيقفلش كويس في حاجه في الزوور بتعيقه السوسته بتاعته ضعيفه كدا يعنى .. 

 دا رشاش قاعده الكربيراتير نخلي بالنا منه كويس وننظفه كويس جداً

دا مسمار الهوا ودا مكانه في قاعده الكربيراتير بيتفك ويتظف كويس وبرضه يتنظف مكانه الاسبراى 

مصفه الكربيراتير بتتفك زي الصور بمفتاح ١٤ وجواها مصفه بلاستيك عبيطه زي الصور بتتنضف وترجع تاني تتركب

طبعا عشان نغير جوان وش الكربراتير لازم نحل العوامه وهنا اكتر حاجه حساسه في الكربراتير بنتعامل معاها برقه عشان لو زعلت هتزعلنا في فلوسنا بتتفك لثلاثة اجزاء زى الصور بتحل الاكس اللي ماسكها بكل سهوله وبتطلع بالابره بتاعتها في ايدك اهم حاجه نحفظ شكلها قبل ما نحلها 

نرجع تاني لقاعده الكربراتير عشان فيها جزء مهم قوى يهم جميع الاعضاء اللي بيعانو من مشكله الدواره الصبح والتبطيل والتقطيع المستمر طول ما العربيه بارده شايفين الثلاث اخرام اللي في الزور تحت الباب مباشرة دول بيتنظفو كويس جدا عشان دول طول ما الباب مقفول وانت شايل رجلك من علي دواسة البنزين ( الاكسراتير ) هم اللي بيدخله الهواء للمكنه من ورا الباب

وفي الاخر خالص قبل ما نركب العوامه بنركب جوان وش الكربراتير الجديد وبنستعد عشان نراجع كل الخطوات بس بالعكس عشان نقفل الكربراتير زي ما كان .

ملحوظه مهمة جداً للناس اللي مش متمرسه في المجال دا متفكش كل حاجه مره واحده فك كل جزء لوحده ونظفه وركبه تاني عشان متنساش مكانه

طبعا زي ما باين في الصور الجوان القديم مقطوع ( انتهك عرضه ) وحمام بيتنا برده انتهك عرضه 

طبعا مش هتصدقوني لو قولت لكم ان البنزين دا كان شفاف قبل عمليه الغسيل 

 

واخيرا الكربراتير بعد التنظيف وبعد ما اتركب وبقي زيرو

طبعا البوز التخين النحاس دا اللي بيوصل لخرطوم طرمبه البنزين اتفك مني وانا بقرط عليه في العربيه فتضريت اني افك الكربيراتير تاني واطلع علي الخراط واعمله قلاووظ وخد مني 15 جنيه

اخر حاجه بنعملها بعد ما نخلص تنظيف اننا نظبط بك السلانسيه والهواء واللى هيتعمل كالتالى :
هتوطي مسمار السلانسيه لاوطي حاجه قبل التبطيل يعني اوطي صوت وبعدين تلف مسمار الهواء ناحيه اليمين لحد قاعدته وبعدين ترجع تلفه لفتين ناحيه الشمال اتجاه الفتح وترجع تاني من ربع لفه لنص لفه فى اتجاه اليمين القفل لحد متوصل لاوطي صوت منتظم من المكنه

وده فيديو برضه بيشرح تنظيف وظبط الكربراتير للمهندس / أدهم حسام

وده فيديو برضه بيشرح طريقة فك وتنظيف وضبط الكربراتير من الألف للياء للمهندس / محمد حسين

 نيجى للتكلفه بقى :

الاسبراى المنظف   ـ   12 جنيه

الاسبراى WD 40  ـ  20 جنيه

جوان وش             ـ  2 جنيه

مصنعية خراط       ـ  15 جنيه

فلتر هواء              ـ  12 جنيه

 فلتر بنزين            ـ  5 جنيه

وطبعا وفرت 120 جنيه مصنعيه لان انا الصنايعي اللي قام بالمهمه والحمد لله والشكر له .

اظن كدا شرحت كل حاجه باستفاضه ناقص اقولكم علي الاداء وهقول عليه حاضر

اولا العربيه ماشاء الله بقيت ادور واطلع اجري مش محتاج اسخن وبالنسبه للسحب بقت مسعوره بمعني الكلمه طبعا بعد ما ظبت مسمار الهواء مع البنزين العربيه بقت فيها صوت صفاره طالع من الكربراتير زي ما يكون مركب تربو صوت تحفه .

ثانيا لما بكبس جامد العربيه بيبقي فيها صوت زئير زي ما يكون راكب عليها فلتر هواء سبور والفضل لله .

يارب يكون الشرح وافى ويكون كل واحد قدر يفهم بالظبط هيعمل ايه واتمنى تكونو استفدتم . 

-----------------------------------------------------

اتمنى يكون الموضوع عجبكم

مع تحياتى  Ahmed Esmat