بسم الله الرحمن الرحيم
ناس كتير نفسها تفتح شنطة العربية زى العربيات الحديثة بدل ما تضطر تبطل العربية وتنزل تفتح الشنطة .. يادوب تدوس على زرار الشنطة تفتح .. مثلا وانت داخل بنزينة او مول ساعات الامن يطلب منك تفتح الشنطة .. ساعتها تتخنق وتبطل العربية وتنزل تفتحهاله وتقف معاه .. معايا الموضوع مختلف .. هنخلى العربية زيها زى العربيات الحديثة وتفتح شنطتك بسهولة وانت قاعد جوه العربية .. وعلى فكرة .. ممكن برضه منلغيش الكالون من بره بحيث تقدر تفتحها بالمفتاح لو حبيت .. يبقى كده معاك تفتحها اتوماتيك وكمان بالمفتاح .. المهم ندخل فى الموضوع عشان مطولش عليكم .
أولاً هتنزل عالتوفيقية عند محل حسنى حكيم او عند اي حد بتاع قطع غيار تشترى قربة سنتر بلوازمها ب 15 جنيه ومعاها زرار كلاكس نوع تركى ب 5 جنيه
هتفك كالون الشنطة وتاخده لأي سمكرى او بتاع شكمانات او اي حد بيلحم باللندة ( زي مابيقولو الصنايعية ) :D يلحملك وردة 8 او 10 فى ظهر لسان الكالون زى الصورة كده
هدخل
الخوصة اللى جاية مع السنتر الاول فى الوردة ولو عدت من الوردة حاول تشوف
وردة صغيرة بحيث متخليش الخوصة تعدى من الوردة وبعدين تركب الكالون تانى
فى الشنطة وتربط الصامولتين ال 10 بمفتاح 10
هتربط
الخوصة اللى جاية مع القربة فى القربة بالمسارين اللى جبتهم برضه مع
الحاجه وبعدين تخرملها خرمين فى صاج الشنطة فى اقصى اليمين يعنى ناحية
الكرسى اللى جمب السواق والسلكة الخضراء دى الارضى هتحطها تحت الخوصة
تلمسها بالمسمار او صاج الشنطة وتربط عليها المسمار وتثبتها على كده
هتجيب
الزرار وتثبته فى اي مكان يعجبك .. ممكن مثلا الفبرة اللى تحت علبة
الفيوزات او التابلوه او الكونسوله على حسب المتاح عندك تقدر تثبته فيه
بعد
ماتربط القربة وتثبتها وخلاص ثبتت الكالون هتربط الخوصتين اللى جايه من
القربة واللى جايه من الكالون بالقفل اللى جاي مع القربة وتظبط بيه المسافة
بين القربة والكالون وترجع بايدك راس القربة للأخر خالص وتثبت وتربط على
كده
دى
طريقة توصيل الكهرباء .. السلكة الخضراء اللى فى القربة أرضى ودي ممكن
تحطها تحت الخوصة وتربط عليه بحيث تبقى ملمسة بصاج العربية ارضى والفردة
التانيه هتوصلها بأي طرف فى الزرار وطرف الزرار التانى هتوصلة بالكهرباء
دايركت يا اما من البطارية دايركت يا اما من اول فيوز كهرباء او من كهرباء
الكاسيت او الولاعة
وبكده الشنطة هتفتح معاك بمجرد انك تدوس عالزرار على طول زيك زي العربيات الحديثة :) ومبروك مقدماً
--------------------------------------------------------
