بسم الله الرحمن الرحيم
نستكمل الصيانه الدورية للسيارة بأذن الله بصيانه الاسبراتير وتغير طقم الكهرباء ( الابلاتين والكوندنسر ) اللى بيعانى منهم دايما الشعب المصرى .
فى البداية احب اوضح كام نقطه بالنسبة لمشاكل الاسبراتير او ازاى نعرف ان الابلاتين والكوندنسر عايزين يتغيروا :
- صعوبة فى الدوارة
- تنتيش أثناء المشى
- برجلة ورجة فى العربية
- صعوبة فى الدوارة
- تنتيش أثناء المشى
- برجلة ورجة فى العربية
ملحوظه هامه جدا جدا جدا نقلاً عن تجربة الأستاذ Mahmoud SaȜid ElMasry
بالنسبة لأنواع الابلاتين عندك نوع اسمه فينوكس روسي و دا عن تجربة كويس جدا و شغال و كنت بجيبه من شارع دمشق و عندك الHPC الازرق المعفن دا شغال مش بطال , و عندك الفرنساوي و اياك تيجي جنبه و بستخدم كندنسر الديسيلير بتاع البيجو احسن بمليون مرة انزل لأى حد بتاع بيجو قوله عايز كوندنسر بيجو الكبير و ركبه .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
( الموبينه الالكترونى )
طبعا الموبينه عندى الكترونى وطبعا كان اعتقادى الشخصى انها بتدى كهرباء زياده اقوى من العاديه فعلشان اتغلب علي القصه دى ركبت اتنين كندنسر علي الاسبراتير اعتقاداً منى بإن كدا بقلل الجهد واخف الحمل من علي الابلاتين طبعا اعتقادي مكنش مظبوط اوي لان اللي عرفته ان الموبينه اللي عندي فيها مقاومه لتثبيت التيار فطبعا هستغني عن كندنسر وهركب واحد بس جديد
دا الاسبراتير اللي راكب عندي بتاع الجراند لوكس بكلبسين من الجنب وطبعا ليه طقم كهرباء مخصوص بيه غير الاسبراتير الصيني طبعا ودى صور طقم الكهرباء فرنساوى
نبدا بفك وش الاسبراتير بكلبسين من الجنب بيتشدو لبره فقط
بالمره نشيك علي وش الاسبراتير ان كانت حوافه النحاسيه متاكله او محروقه او ملدوعه والفحمه اللي فى النص تمام وشغاله ولا السوسته بتعلق
طبعا اهم خطوه هي الخطوه اللي جايه اني بحفظ كويس جدا شكل واتجاه شاكوش الاسبراتير ويفضل اني اضع علامات علي جسم الاسبراتير بمفك مثلا او اعمل علامة بقلم ماركر واني احفظ برده اتجاه الكندنسر طبعا انا بالنسبالي الكندنسر تحت اول بوجيه والشاكوش كان بالمنظر دا خلينا فاكرين كويس المنظر دا عشان لما نركب الاسبراتير لازم يبقي بالوضعيه دي عشان العربيه متخلفش تقسيمه ونضطر ندخل نفسنا فى حوارات تانيه
نفك الشاكوش ونبدا بفك صاموله الاسبراتير مقاس 13 بمفتاح ١٣ انا بالنسبالي بستعمل البلدي مع الاسبراتير عشان قصير وبيخلينى اتحكم افضل
صاموله الاسبراتير بنفكها وبنشيل معاها المشبك اللي بيمسك الاسبراتير عشان يبقي معانا الاسبراتير حر ويطلع بسهوله
ودا منظر الصاموله بالمشبك بعد الفك
هنا الاسبراتير فعلا بقي حر معانا وطلع بسهوله ناقص بس نفك سلك الموبينه الاحمر عشان نطلعه خالص
اول حاجه هنتمم عليها مسمار عمود الاسبراتير عشان لو مش مربوط كويس هيعمل رفه فى الاسبراتير وهياكل رمان البلي ويبوظ الاسبراتير واي ابلاتين هيركب بعد كده
هنفك الابلاتين من المسمار ده فقط
وهنفك الفيشه بتاعه الابلاتين وفيشه الكندنسر والترمله اللي جايه من سلك الموبينه الاحمر كلهم من الصاموله دي ونخلي بالنا عشان بيبقي فى فبره مدوره من بره بيشبط فوقها سلك الموبينه والكندنسر ومن جوه فبره مربعه بيركب جواها فيشه الابلاتين قبل مانركب المسمار الخاص بالصاموله دي مقاس ٦
دا منظر الفبر والمسمار والصاموله اللي اتكلمنا عليهم
طبعا كده الاسبراتير بقي فاضي تماما نديله بقي الغسله التمام بالبنزين اللي هترجعه زيرو مرايه زي الصوره دي
نبتدى نركب الكندنسر الجديد من المسمار بتاعه من بره الاسبراتير
الصوره دي بقي اكبر دليل شاهد علي نتيجه الاهمال والقعاد فتره كبيره بدون تغير الابلاتين او تشحيم شفه الابلاتين علي الاقل طبعا الشحم نشف مع الزمن والشفه بتاعت الابلاتين كانت بتحك علي الناشف لحد مكلت عندي اطراف الساقيه بتاعه عمود الاسبراتير معلش محدش بيتعلم ببلاش
طبعا عشان اصالحها حطتلها احلي واغلي شحم فى السوق كان عندي اصلا من ساعه الكبالن
دي بعد التشحيم
نبتدي نركب الابلاتين تاني زي ما فكيناه ونراعي اننا منقرطش علي المسمار اوي غير لما نظبط فتحه الابلاتين بتتظبط عن طريق اننا نخلي طرف الساقيه واقف مع شفه الابلاتين عشان نظبط الفتحه زي الصوره طبعا انا معنديش فيلر عشان اضبط بيه فاضبطه بالخبره والممارسه بالعين المجرده والحمد لله الضبطه طلعت تمام
خلاص ضبطنا خلوص الابلاتين نقرط بقي علي المسمار بتاعه ونبتدي نجمع تاني المسمار الخاص بفبر الاسبراتير اللي بيركب فيه الكندنسر وسلك الموبينه من بره ومن جوه الاسبراتير سلك الابلاتين ونقرط كويس
خلاص هنركب الاسبراتير يبقي نركب الشاكوش الاول ونضبطه علي العلامه اللي معلمينه بيها فى جسم الاسبراتير والعلامه اللي معلمين بيها الكندنسر فى جسم العربيه اللي كانت بالنسبالي تحت البوجيه الاولاني بحيث نركبه فى نفس الوضع اللي فكيناه بيه واوعي ننسي نوصل سلك الموبينه الاحمر اللي فكيناه من البدايه من الاسبراتير
نركب بقي المشبك بتاع الاسبراتير ونركب فوقه الصاموله ال13 ونبتدي نربط بس منقرطش عشان لما ندور نضبط كهربه الاسبراتير بحيث متبقاش واطيه ولا عاليه اوي فتسقف فى المشي طبعا الضبط بيبقي من خلال اننا نلف الاسبراتير والعربيه دايره يمين وشمال لحد منوصل لافضل ضبطه .
طريقه ظبط الاسبراتير ( تقديم الكهربا وتأخيرها )
---------------------------------------------
طريقه ظبط الاسبراتير ( تقديم الكهربا وتأخيرها )
الأسبراتير الأول علشان تظبطه لازم تفهم وظيفته .. اولا بيسموه بالأنجليزي Distributor (موزع) وفعلا هو بيقوم بتوزيع الشرارة (بتاعة البوجيهات) طب ازاي ؟؟؟؟ فكرته بسيطة جدا .. مع لفة الكرنك بيلف الأسبراتير بيلف الشاكوش بيلمس طرف الشاكوش بأقطاب سلوك البوجيهات يقوم موزع الكهرباء بأنتظام شديد علي سلوك البوجيهات .. وبردو بنفس الترتيب السابق ذكره ( اول - ثالث - تاني - رابع ) .. علشان يدي كهربة للبوجيه يقوم عامل spark ( شرر ) - في نفس توقيت طلعة البستم يقوم الأحتراق الناتج مولد قوة تدفع البستم - وهكذا مع كل سلندر ( 4 بوجيه مقابل 4 سلندر مقابل 4 بستم مقابل 8 صباب - 2 لكل سلندر واحد بنزين والتاني للعادم )
امال اظبط ازاي ؟؟؟ عن طريق اللف يمين ويسار .. لما بتلف الأسبراتير انت بتقدم توقيت الشرر عن طلعة البستم او بتأخرها عن توقيت طلوع البستم .. فالظبط في غاية الأهمية - لأنها لو مقدمة ( تسبق الطلوع ) هتدى شرر قبل البستم وبالتالي حصل احتراق قبل طلوع البستم فتلاقي العربية عالية وبتعمل صفع ( بتسقف او بتكتك لما تدوس بنزين ) ولو مأخرة ( بعد طلوع البستم ) هتحس بهدر وفقد في الطاقة والعربية واطية ( يعني ار بي ام واطي او قليل ) ومش بتسحب معاك .. يفضل تبطل العربيه الاول وتهوى الصاموله ال 13 بتاعه الاسبراتير عشان يبقى حر الحركه معاك وهتلفه يمين سنه بسيطه اوى وتطلع تجرب لقيت تسقيف يبقى كهرباء زياده هترجعه سنه صغيره للاتجاه المعاكس وتجرب لحد ما تلاقى العربيه مش بتسقف وفى نفس الوقت بتسحب ومش مخنوقه وممكن من غير ما تطلع انك تضغط بنزين على الاخر وتسمع لو فيه صوت تسقيف من عدمه . وهى دى ظبطه الاسبراتير .
------------------------------------------------
وبكده نكون وصلنا للنهايه ...
يارب يكون الشرح وافى ويكون كل واحد قدر يفهم بالظبط هيعمل ايه واتمنى تكونو استفدتم .
اشوفكم مرة تانيه فى شرح جديد وموضوع جديد .
مع تحياتى Eng / Ahmed Esmat
