الاثنين، 16 فبراير 2015

سلك الدبرياج اتقطع منى ومش عارف اعمل ايه !!! هشرحلك طريقة تغيير سلك الدبرياج بالصور

 بسم الله الرحمن الرحيم


ناس كتير بتبقى ماشيه فى امان الله وفجأة سلك الدبرياج بيتقطع بدون اى مقدمات او اى سبب .. ساعتها بيبقى موقف صعب وخصوصاً لما تكون فى وقت متأخر جداً او وقت بدرى جداً او يوم مثلا زى يوم الأحد بيبقى كل الصنايعية وكل المحلات قافله .. ساعتها بتبقى مش عارف تعمل ايه ولا عارف تتصرف ازاى خصوصاً لما يكون معاك عيلتك او حتى ماشى لوحدك .. المهم .. عشان تبقى فى الأمان خلى دايما معاك سلك دبرياج زيادة احتياطى تحسباً لأى موقف مفاجئ ممكن يحصل فى أى وقت لاقدر الله .. وبرضه يبقى معاك علبة شحم وشوية زيت بتاع العربية وياسلام لو معاك مزيته تخليها برضه فى شنطة العربية والحاجات دى كلها رخيصة وبتتباع كلها فى رمسيس والتوفيقية رخيصة جداً يعنى المزيته دى ب 15 جنيه ( الكبيرة ) والصغيرة ب 10 جنيه تقريباً بس بتنفع بصراحه وعلبة الشحم برضه 10 او 15 او 20 جنيه فى انواع كتير وسلك الدبرياج الايطالى ب 17.5 جنيه وهتخلى معاك برضه صواميل 10 وورد احتياطى او تشترى صامولة مخصوص بتبقى لسلك الدبرياج مقاسها 17 بس القلاووظ اللى جواها بيبقى مقاس 10 نفس مقاس قلاووظ سلك الدبرياج ومعاها حته رصاصة كده بتبقى شغلتها زى رجلاش تعلى السلك بدل ماتحط صواميل كبيرة وسعرها جنيه ونص وسعر الرصاصه دى زيها برضه 1.5 .. وخلى معاك منها ديما زيادة عشان السلك لما بيقطع بتضيع فى الشارع على طول .. وده شكلها :






 وده شكل سلك الدبرياج الإيطالى .. ( للناس اللى متعرفش شكله )



ندخل فى الموضوع :


دلوقتى انت واقف عالطريق وسلك الدبرياج اتقطع منك وطبعاً انت معاك واحد استبن شايله معاك فى الشنطة .. اول حاجه هتعملها قبل اى حاجه .. هتجيب السلك الجديد اللى معاك وتشحمه كويس من الطرفين وتبدأ تسحب السلك رايح جاى بحيث تدخل الشحم جوا الجراب بتاعه وبعد ماتخلص تشحيم ابدأ بعمل نفس الكلام بالزيت يعنى هتخلى الزيت برضه يدخل فى الجراب من جوه وتزيت الواير كله بحيث ان السلك يبقى مرن وناعم وثلث فى الحركة .

( الشحم )

( المزيته )

 تشحم الواير وتسحبه من هنا ومن هنا بحيث تخلى الشحم يدخل جوه الجراب الاسود ونفس الكلام مع التزييت

دلوقتى بقيت جاهز انك تغير سلك الدبرياج خلاص وكل ماعليك انك هتنزل تشوف بدال ( دواسة ) الدبرياج تحت هتلاقى اولها خالص من فوق مسمار بصامولة صغيرة 8 تقريباً دى متشبط فيها طرف سلك الدبرياج فى الدواسة .. هتفك الصامولة دى وتخلع منها السلك .. بعد كده هتقوم تفتح الكبوت وتسحب باقى السلك المقطوع من الناحيه التانيه تطلعه بالجراب بتاعه بحاله بماله كده وترميه .

( مكان المسمار فى اول البدال من فوق )

هتجيب السلك الجديد اللى شحمته وزيته وتدخل اول طرف السلك ( اللى فيه خرم ) فى الفتحه اللى موجوده فى الصدر من ناحية الموتور بحيث تطلعه من الناحيه التانيه ( جوه العربية ) وتشبطه فى المسمار اللى فى البدال بنفس الطريقة اللى فكيته بيها تركبه فى المسمار وتربط عليه الصامولة ويادوب تربطها بايدك بس ومتقرطش عليها للأخر وسيبها مهوية ولا حتى تفكر تربطها بمفتاح .. بإيدك وبس .. لان مهمتها متخليش السلك يفلت من المسمار .. لكن لو قرطت عليها انت كده بتحجم السلك وتخليه ميتحركش براحته وممكن تخليه يقطع بسهوله فى اقرب وقت.. تمام لحد كده .. قبل ماتقوم وتمشى لو فى حد معاك فى العربية خليه يرفعلك بدال الدبرياج ميبقاش ساقط عشان تعرف تطول السلك الناحيه التانيه وميبقاش قصير ولا حتى تحمل على ايدك وتشد انت البدال .. لو مفيش حد هات اي مفك او اي حاجه حاول تحطها تحت البدال ترفعه بيها متخليهوش ساقط ولا مريح .


 (مكان الفتحة اللى هتدخل فيها السلك فى جسم الفتيس وتوصله لحد دراع الفتيس)
  

 هترجع تانى ناحية الموتور هتدخل سلك الدبرياج فى فتحه موجوده فى جسم الفتيس تعديه منها وتوصله بالدراع اللى راكب فى الفتيس وتحط الرصاصة دى وتركب الصامولة بالشقلوب ( معكوسة ) .. يعنى متخليش القلاووظ يبقى هوا اللى على طول منه للسلك اقلبها عشان تبقى عاليه شوية عشان لما تيجى تدوس دبرياج ميبقاش فى حك فى التروس او النقلات متجيش الا بصعوبة .. دخلت الصامولة .. اربطها بقى .. وشد دراع الفتيس ده بايدك لحد ماتجيب اخره على قد ماتقدر وافضل اربط الصامولة بإيدك للأخر او ممكن تستعمل مفتاح 17 بس مش مستاهله لإن الصامولة بتبقى مستريحه معاك وانت شادد دراع الفتيس .. تمام كده .. ادخل بقى وجرب دوس دبرياج وانقل نقلاتك وشوف بتيجى معاك ولا لا قبل ماتدور العربية .. وبعدين جرب دور العربية وجرب ادى نقلاتك بس طبعاً بالراحه عشان لو السلك لسه محتاج يتشد متخليش التروس تحك فى بعض لو تمام جرب دوس سنة بنزين وشيل دبرياج كأنك هتتحرك بالعربية شوف العربية بتطلع معاك على طوول ولا لازم تسيب دواسة الدبرياج كتير !! لو تمام يبقى خلاص .. لو لازم تسيب البدال كتير عشان العربية تتحرك يبقى تمور العربية وترجع تهوى الصامولة سنة بسيطه .. وبعدين ترجع تانى وتجرب وتشوف لحد ماتظبط المسافة اللى على هواك .
 وبكده نكون خلصنا :) واتمنى تكونو استفدتم .


( مكان سلك الدبرياج من صدر العربية لحد دراع الفتيس )


 
( ده شكل الصامولة بعد ماتتربط )
 

ملحوظة : انا شايل البطارية على فكرة من المكان ده وناقلها مكان مروحة التكييف :) عشان محدش يستغرب من الشكل .. وفى صور قديمة وجديدة ..




----------------------------------------------------

يارب يكون الموضوع عجبكم ...

مع تحياتى






جميع الحقوق محفوظة لــ Monster Fiat 128 2016 ©