الخميس، 7 أبريل 2016

طريقه عمل عمره كامله للموتور بتاعك بنفسك وبالخطوات



بسم الله الرحمن الرحيم

موضوع الناهرده مهم جداً لكل الناس المبتدئة اللى حابه تشتغل بنفسها فى العربية وتبعد عن الصنايعية ، الموضوع هيكون طريقه عمل عمره كامله للموتور بتاعك بنفسك والشرح هيكون بالخطوات ، وان شاء الله مش هيبقى فى حاجه صعبة

فى البداية هنبدأ بالفك وهنا هاننزل الموتور على الارض خالص مش هانشتغل فى الحوض ودة عشان الطريقة تمشى مع عمل شنبر او عمرة كاملة 

خطوات فك الموتور من جسم السيارة 

- أول حاجة هنفكها البطارية عشان ميحصلش اى قفله لو اى سلوك كهرباء لمست مع أرضى وخصوصاً لما نفك كابل الكهرباء العمومى الواصل للمارش وبعدين هنفك خراطيم البنزين الداخلة والخارجة من الطرمبة وبعديها سلوك البوجيهات الواصلة بالاسبراتير وبعدين نفك الاسبراتير برضه عشان ميتخبطش ولا يتكسر ومفيش مانع نفك الموبينة برضه وبالمرة نفك الكربراتير ، ونبدا نفك الردياتير والخراطيم الداخلة والخارجة للموتور ، هنفك سلك الدبرياج وطبعا اتياش البنزين فى الكربراتير ولو عندك سلك اكسراتير بدل الاتياش هتفصله من الكربراتير ، هنفك كابلات المارش ومن ثم المارش كليا عشان بعد كده هندخل على التقيل ،
هنفك العجلتين الامامى بعد رفع العربية بكوريك وبعدين هنفك الكبالن الداخلية والخارجية ونركنهم على جمب ، وأخر حاجه قبل ما نبدأ نفك قواعد الموتور عشان مننساش نفضى زيت الموتور فى جركن او طبق غويط وده بيتم عن طريق فك مسمار كرتيرة الزيت ونسيب الزيت ينزل منها كله .

- المرحلة اللى بعد كدة جسم الموتور نفسه وده متثبت بـ 3 قواعد فى جسم السيارة :
القاعدة الاولى وهى اللى فى كرتيرة السيارة الشمال وانت واقف امام السيارة ودى سهلة جدا لانها باينة وواضحة بمجرد فك مسمار التثبيت كدة القاعدة بقت برة اللعبة .

القاعدة الثانية اسهل بكتير لانها تعتبر شداد للموتور وهى موجودة اسفل الاستبن ودى هانفكها من جسم السيارة وكمان من جسم المحرك عشان الشداد دة طويل وممكن يلاخمنى وانا بسقط المكنة عالأرض أو برفعها بالونش ( بلانكو )

وعلى فكرة موتور الـ 128 سهل يتشال من غير ونش وممكن ينزل على الارض اسهل وبنرفع العربية من فوق منة لان وزنها بيبقى خفيف ، اما لو عندك بلانكو يبقى اريح ليك هترفع بيه المكنة وترجع العربية لورا وبعدين تسقطها عالارض تانى .

القاعدة الثالثة ودى تعتبر أرخمهم وهى القنطرة السفلية ومثبت فيها القاعدة المثلثة الموجودة بالفتيس هننزل تحت العربية ونبدأ بفك الـ 3 مسامير المثبتة للقاعدة فى الفتيس وبعد الفك هاتقابلنا مشكلة القنطرة لانها هاتعوق نزول الموتور فى الارض وعشان نفك القنطرة هاندخل جوة صالون العربية ومن عند منتصف الصدر فى فتحة مربعة فى الارضية غاطسة فيها مسمارين بتوع القنطرة هانفكهم ودة بيتطلب انك تشيل جزء من فرش الارضية ولكن هتحتاج واحد معاك يمسك راس المسمار من جوة الصالون وانت بتفك الصامولة من تحت الحوض ولما نخلص نفك القنطرة من الجزء الامامى للحوض من عند القنطرة الامامية
طبعا مش محتاج انى افكرك انك لازم تكون محمل المكنة بالفتيس بالكامل على كوريك تمساح وده غير الكوريك اللى هتكون رافع بيه العربية ولو عندك حاجة تحمل عليها العربية يكون افضل زى بلوكين رصيف مثلا او الاستاندات الحديد المثلثة دى عشان متحتاجش ل 2 كوريك .

دلوقتى بعد ما فكينا القنطرة بكدة المكنة بقت فى الهوا ونبدأ ننزل الموتور على الارض واحدة واحدة بالكوريك وممكن نرفعه من عالكوريك بسير كاتينه قديم او جنزير او حبل يكون جامد تربطه فى جسم الموتور عشان تحمل عليه بس هتحتاج 2 معاك يساعدوك فى الموضوع ده واما نطمن انة كليا بقى على الارض هنرفع العربية لفوق ونرجعها لورا عشان تبقى بعيد عن الموتور عشان نبدأ الشغل .

لو عاوز تغسل المكنة بالجاز عشان تشتغل على نضافة وبال رايق ومالة اديها غسلة سريعة عشان كل حاجة تبقى منورة ادامك وكمان شكل ترشيح الزيت مش حلو .

دلوقتى متهيالى ممكن نفك الفتيس من الموتور عن طريق مسامير الداير وخد بالك احنا شايلين المارش من الفتيس ودلوقتى ممكن نركن الفتيس على جنب مش محتاجينة 

نفك الدسك من على الموتور عن طريق المسامير المثبتة للدرك على الفولام ، ونطلع الاسطوانة لانها ملهاش اى مسامير تثبيت .
نجيب بقى مفتاح لقمة من نوع كويس اوى المانى على سبيل المثال ونفك الـ 4 مسامير بتوع الحدافة بس هاتقابلك مشكلة هنا انك كل اما تيجى تفك تلاقى عامود الكرنك بيلف منك وللتغلب على هذة المشكلة بنجيب نص سبيكة قديمة طبعا ونضؤرها على سنون الفولام وعلى جسم الموتور فى اتجاة معاكس لحركة الفك اللى هو شمال طبعا ، يعنى لو انا واقف قدام الموتور من ناحية الفولام وهفك الـ 4 مسامير طبعا عكس عقارب الساعة يبقى السبيكة تتثبت من الناحية الشمال ، وبعد الفك هتلاقيها لزقة مش عاوزة تتطلع نجيب شاكوش متوسط ( 1 كجم مثلا ) وندق دق خفيف اكنك بتكسر بندق وخايف لتكسر اللى جوة البندقاية والدق ميكنش فى حتة واحدة ولكن على محيط الفولام بصورة متالية ومتتابعة وخلى بالك من الخابور اوعى يضيع منك .

نلف المكنة ونبدا بفك الدينامو كليا مش السير بس ونفك وش التقسيمة البلاستيك
ونهوى بلية الشداد ونخلع سير التقسيمة ونشيل كل الكلام دة على جنب

دلوقتى هانفك طنبورة الكرنك طبعا هانفك المسمار المثبت ليها ودقتين هتلاقيها بقت برة وخلى بالك من الخابور 

دلوقتى انا عارف ان فى مشكلة عدم تثبيت المكنة على الارض وعمالة تتحرك وتوقع منك ، طب ما تيجى نفك كرتيرة الزيت وطبعا دى سهلة جدا عن طريق فك مسامير الداير كلها وننيم المكنة على جنبها ونفك طلمبة الزيت عشان ما تتكسرش وطلع ترس طلمبة الزيت عشان ما يضعش فى الورشة 

ونحط المكنة على ترابيزة نضيفة على الجزء السفلى ليها (ناحية البي يلات) 

تعالى بقى نفك الهد ودة بيتطلب اننا نفك غطاء التاكيهات وبنفس مفتاح العزم الالمانى نفك وش السلندر عن طريق اننا نهوى جميع المسامير بالتتابع المعروف ومن ثم نفكها كلها ودلوقتى بقى عندنا وش السلندر مفكوك والبساتم باينة ، بنظرة الخبير نبص على سطح البساتم ونشوف نسبة الكربون على سطح البستم هل جميعها متساوية ام ان فى بستم او اكثر نسبة الكربون علية اكثر ولا كلهم عليهم نسبة كربون متحجر وعامل تخانة فوق وش البستم لان طبعا دة لة مدلول لو ان فى بستم السطح بتاعة علية نسبة كربون عالية ومتحجرة دة بيدل على ان البستم بيطولة زيت اما من الشنابر واما من الصبابات
نخلى كل بستم فى النقطة الميتة العليا ونحرك البستم بادينا حركة افقية عشان نشوف خلوص البستم فى الشميز ونكرر دة مع الاربع بساتم 

اما بخصوص وش السلندر انا مش عاوز اشوف حاجة فية لانى ناوى اعمل كل حاجة فية من قواعد ودلايل وطقم صباب عشان دة مخ المكنة ولازم يتعمل زى ما قال الكتاب وخصوصا ان التكلفة مش عالية دنا بتعامل مع 8 قواعد وطقم صبابات بـ 90 جنية الفرنساوى اللى هو احسن حاجة 

ما تنساش تحل المانفول من وش السلندر ملوش لزمة يروح للخراط 

هانبدا نفك البيلات والبساتم من البلوك ودلوقتى بقى اسمة بلوك مش موتور 

طبعا هاننيم البلوك على الجنب ونفك مسمارين البي ييل رقم 1 ( من ناحية وش التقسيمة ) ونطلع قاعدة البي يل بالسبيكة بتعتة وبخشبة الشاكوش ندق على ذراع البيل عشان يخرج بالبستم بتاعة من البلوك وبعدين نركب نص قاعدة البيل المحلولة ونشبط المسمارين بتوعها فى باقى البيل ونكتب علي سطح البستم بزنبة ارقام رقم 1 فكدة يبقى عندنا البستم بالبيل كامل والبستم مكتوب علية رقم 1 ومتخفش البيلات مش هاتتلخبط مع بعضها لانها مكتوب عليها الارقام 

بس فى حاجة مهمة اوى هنا اية هى ؟؟؟ اتجاة البستم فى الشميز ،،،، فية بساتم ( الاصلى ) بيكون مرسوم عليها سهم على سطح البستم بيشاور على مكان معين فى البلوك لو مكنش اعملة انت او شوف تجويف الصبابات على سطح البستم فى اى اتجاة عشان فى التقفيل بامر الله نراعى اتجاة البستم فى الشميز ، وبنفس الطريقة هانفك الـ 4 بيلات 

بكدة انت جاهز تودى الشغل للخراط وتعالى نتكلم شوية فى اعمال الخراطة للاجزاء المختلفة للموتور

اولاً لازم تنقى خراط سمعتة كويسة والمكن بتاعة متعاير وجديد لان نسبة نجاح العمرة 99% بتعتمد على توفيق ربنا والخراط 

هو اية اللى ممكن يتم علية اعمال الخراطة وهابدا بالوش ، لو كراسى عامود الكامة مبوشة الخراط بيعملها كراسي ، طبعا الخراط هينفض الصبابات واتفقنا اننا هانغيرهم بجديد نوع فرنساوى وهينفض القواعد عدد 8 وهاينطر الدلايل عدد 8

بالنسبة للدلايل وطبعا انت عارف ان الصباب بيتحرك جوة الدليل حركة ترددية او راسية ومعلهوش حمل اوى لكن الدليل نفسة ممكن يسرب زيت داخل غرفة الاحتراق ،،،، صحيح ان الدليل بينزل شحط فى مكانة انما مش كفاية انا عاوز أأمن شغلى مليون فى المية فبطلب من الخراط انة يعمل دلايل بكراسي واسمها دلايل يابانى وهى عبارة عن ان جسم الدليل من الخارج بيعمل فية سن رفيع جدا بارز عن جسم الدليل عشان اما يشحط الدليل فى المكان بتاعة فى وش السلندر السن دة يعمل زى اويل سيل معدنى يمنع مية فى المية اى زيت يتسرب لغرف الاحتراق 

عمل 8 قواعد للصبابات ودى بيعملها على المخرطة وبعدين بيعملها فريزة وبعدين بيريح الصباب على القاعدة بتعتة بالرودية 

لو ان وش السلندر فى تاكل من مجارى المياة الخراط بيلحم التاكل دة وبيقشط مكانة ودة المسموح بعملة فى الوش انما يقشط الوش بالكامل عشان مقفع والكلام دة مرفوض بالنسبة لى والحل البديل وش سلندر استيراد ستاندر 

دى تقريبا جميع اعمال الخراطة فى وش السلندر وبيتغسل بعدها غسيل من نار والخراط بيجيب شنيور وبيركب فية فرشاة سلك وبينضف مجارى الهواء والعادم من اول مكان المانيفولد لغاية الصباب وبيرجع بيلمع زى الجديد ودى نقطة مهمة جدا عشان اى رواسب بتعمل ممانعة للهواء الداخل للموتور او العادم الخارج منة ونرجع نغسل الوش تانى بالجاز بعد التقفيل النهائى ونسيت اقول لحضرتك انك مش هتعتمد على جلد الصباب اللى بيجى فى طقم الجوانات لان خامتة مش تمام وانما بنجيب جلد صباب فرنساوى وبندية للخراط او هو بيكون عندة عشان ما يعطلش على الزبون 

يستحسن اما تيجى تستلم الوش من الخراط تخلية يختبرة ادامك والطريقة انة بيحط جااااز مش بنزين على الصبابات ونتركها لمدة كافية ونشوف لو فى ترشيح للصباب من عدمة يعنى كمية الجاز لازم ميحصلهاش اى فقد .. وبكدة يبقى الوش بتعنا تمام التمام

بالنسبة للبساتم .. أولاً مفيش أى اعمال خراطة بتتم على البستم .. لازم بالعين نشوف جسم البستم من برة هل فى خرابيش او مجارى نتيجة الاحتكاك او حتى فى جزء مكسور من البستم لان من المفروض ان جسم البستم من الخارج يكون بيلمع ، كمان سطح البستم لازم يكون متساوى ومفهوش اى كسر

نيجى بقى لنقطة فى غاية الاهمية 

مجارى الشنابر .. احنا عمالين نتكلم ان المكنة عاوزة طقم شنبر وبتنفخ زيت والكلام دة ، طب انا اية يضمنلى ان الشنبر الجديد اللى هاركبة هايمنع الزيت المتسرب لغرفة الحريق ، هاتقولى دة جديد ومش متاكل هارد عليك واقولك طب ما يمكن مجرى الشنبر فى جسم البستم هى اللى متاكلة ومبوشة يعنى مهما حكمت الشنبر من جدار الشميز وفى بوش فى البستم نفسة هايخلى الزيت يتسرب لغرف الحريق 

طب الحل اية ؟؟؟؟؟؟؟؟؟؟

هانسيب الحل شوية كدة ونتكلم على الشمايز .. حاجة من اتنين اما اننا هانشغل البستم القديم ونعمل شميز جديد على البستم ، او نجيب طقم بستم جديد زيرو 10 على اعتبار ان البستم القديم كان ستاندرد ونوسع فى الشمايز الموجودة

طب الحالة رقم 2 دى سهلة بستم جديد وطقم شنبر جديد نفس الزيرو او المقاس وهانوسع فى الشمايز الموجودة وخلصنا على كدة 

طب لو هنشغل البساتم القديمة لانها سليمة ومش مكسرة ولا مجرحة وكان فيها بوش فى مجارى الشنابر وبالاخص شنبر الزيت !!!!!! ساعتها لازم نجيب فرش لشنبر الزيت ودة بيكون عبارة عن سلك زنبركى او سلك واخد شكل تمنيات وسبعات معرج السطح يعنى ووظيفتة انة بيخلى شنبر الزيت مضغوط لبرة شوية وبيملى البوش الموجود مكان شنبر الزيت ، ودة الحل اللى اجلناة فى الفقرة السابقة 

عاوزين بقى نشوف الشنبر اللى احنا اشترناه وطبعا بعد عمل شمايز جديدة او توسيع الشمايز الموجودة هل مناسب هلى محمل زيادة 

بمنتهى البساطة نركب الشنبر ( واحد تلو الاخر ) فى الشميز وعشان نضمن استواؤة بوش البستم ندخلة الى منتصف الشميز ونشوف الخلوص بتاع الشنبر كام ملى عن طريق الفيلر ومن هنا تقدر تحكم على الشنبر قبل التركيب مناسب من عدمة والخلوص بتاع الشنبر لا يجب ان يتعدى 0.5 ملم فى اى جزى من اجزاء الشميز من اول الشميز لاخرة ودة ترجع لمدى مهارة الخراط لازم الخلوص يكون واحد مفهوش اى اختلاف 

وبكدة يبقى خلصنا اعمال الشمايز والبساتم والشنابر ، بالنسبة بقى للكرنك وكراسى التحميل والهلايل ، طبعا احنا بنعمل عمرة كاملة واتفقنا ان الموتور بتعنا بيرزع ، وزى ما انت مودى البلوك للخراط راكب فية الكرنك ، بيتم فك الكرنك وعمل تجليخ ودة الاسم الصح للكرنك مش خراطة ، بيتم عمل تجليخ لاماكن البي يلات وتجليخ لاماكن الكراسي ، طب السبيكة اللى راكبة ستاندر يبقى هانجلخ ونجيب سبيكة زيرو عشرة او على حسب التاكل الحادث فى ركب الكرنك ممكن الخراط يقولك زيرو عشرة مش هاتنفع لان الكرنك فى تاكل كبير هاتلى زيرو عشرين ومالة ساعتها هاجيب طقم سبيكة بالمقاس المطلوب من الخراط لانى هاستلم شغلى منة واحسن سبايك موجودة هى سبايك المصانع الحربية اسمها سبيكة مصانع ودى هاشتريهم واوديها للخراط او ممكن يكون الخراط نفسه عنده منها جديد وهو بيقوم بتجليخ الكرنك وبيركب الكراسي وبيقرط عليها انما ما يمنعش انك تعيد الرباط على كراسي الكرنك للتاكد ، وبتستلم منة الكرنك بيدور بمنتهى السلاسة على كراسية وما فيش اى خلوص بين الكرنك وبين الكراسي لان الهلايل راكبة فى مكانها بالمظبوط ومستريحة كل ما عليك تلف الكرنك لازم يكون زى الملبن حاجة كدة تستمتع بيها وبعد كدة هافك بايدى الكراسى تانى عشان انضف مجارى الزيت حد عارف مش يمكن فى مجارى مسدودة او شبة مسدودة مش بتوصل زيت للكراسي لا يا عم انا انضفها بالهواء بايدى احسن هو انا وراى حاجة 

متهيالى كدة خلصنا جميع اعمال الخراطة للمكنة .. نيجى بقى للتقفيل
اولاً لازم كل مسمار فى الموتور يتغسل بالجاز غسلة محترمة اوى واى مسمار المخ بتاعة متاكل لازم يتغير واى مسمار السن بتاعة مفوت لازم يتغير وخلى جنبك علبة شحم ومزيتة
وعاوز اكرر تانى على النضافة لانها نقطة غاية فى الاهمية وتخلى فى ايدك فوطة صفرا نضيفة واى حاجة تشوفها تمسحها بالفوطة الصفرة اكنك موسوس بالظبط ولازم تشتغل فى مكان نضيف على ترابيزة نضيفة اوى واوعى من التراب حتى اللى فى الجو 

اول حاجة بتتقفل هى الكرنك بتجيب الكرنك وتركب الكراسى بتعتة واكيد حضرتك بالمسدس الهواء نضفت كل مجارى الزيت الموجودة فى البلوك وخصوصا مجارى الزيت المغذية لكراسي الكرنك بما اننا شغالين فيها دلوقتى 

وطبعا وانت بتركب الكراسي لازم تديها زيت قبل التقفيل وانا بصراحة مش فاكر عددهم اما انهم 3 كراسي او 4 مش فاكر بصراحة وعاوزك بقى تربطهم رباط من نار طبعا بمفتاح لقمة وماسورة وتحرق عليهم بضمير اوى اوى

ركبنا كدة كراسي الكرنك والهلايل ولازم نختبر لف الكرنك بسهولة وسلاسة 

تعالى بقى نركب البستم رقم 1 اللى اتفقنا انة من ناحية وش التقسيمة 

طبعا البستم راكب فى ذراع البيل ونص السبيكة العلوى بالبيل راكبة وانا حاطط زيت على جدار الشميز وفى واحد معاك بيساعدك 

هنركب شنبر الزيت وحلقتين الضغط وخلى بالك من اتجاة شنبر الضغط اما ان فى حرف بيكون لفوق او بايدك تشوف تجويف الشنبر هتلاقية لفوق عشان يضغط ولكن معظم الشنبر بيكون فى حرف هجائى ودة الدليل بتاعك انة لفوق 

طب اتجاة فتحات الشنابر ازاى؟؟؟؟؟؟؟؟؟ دى نقطة غاية فى الاهمية والاجابة انها لازم تكون على شكل نجمة مرسيدس وبعيدة عن بنوز البيلات ،،، حذارى انك تركب فتحة الشنبر اعلى بنز البيل ادامك محيط البستم كولة اختار اى مكان لكن يكون بعيد عن بنز البيل وتعمل نجمة علية بالشنبر اللى بعدة وشنبر الزيت 

طبعا انت حطيت قليل من الزيت على جسم البستم وعلى البنز ،،،،، نجيب زرجينة البساتم ونركب فيها البستم ونخلى بالنا اوى من اتجاة البستم لو تفتكر السهم او اتجاة تجويف الصبابات وبضهر الشاكوش ندق دق مكتوم على سطح البستم لغاية اما يبقى فى النقطة الميتة العليا وزميلك اللى معاك يكبس مكان البيل على الكرنك وبعدها تربط سبيكة الكرنك وتقرط عليها من نار بالماسورة وباكد عليك الرباط يكون من نااااااااااااااار اوعى تتهاون او تخاف ان المسمار يفوت انا عندى يفوت احسن ما يهوى من الشغل وعادة بيكون فية وردة تحت المسمار بتعمل عمل التيلة عشان المسمار ما يفكش من اثر الشغل وبعد اتمام عملية الرباط نلف الكرنك لفتين تلاتة عشان نعرف ونضمن ان البستم شغال فى الشميز بتاعة زى السكينة فى الحلاوة ،،،،، تذكر زى السكينة فى الحلاوة يعنى بدون مجهود فى الدوران وبدون صوت البستم لازم يطلع وينزل سلسل وبتناغم وتحس بية وانت بتلفة كدة وبنفس الطريقة هانسقط الـ 3 بساتم الباقيين 

نفسي ربنا يبارك فى الوقت ونكمل تقفيل المكنة 

دلوقتى ممكن نركب طلمبة الزيت عشان نقفل الكرتيرة لحسن رمل او تراب يدخل جوة المكنة 

هاتقولى المكنة مش متزنة وعمالة تروح يمين وشمال منى ومش عارف امسكها اؤلك ومالة اتعب انت شوية وحاول تحطلها قرمة خشب من هنا ولا من هنا عشان تتزن انما اسيب المكنة معرضة للهوا لا !!!

تعالى بقى نركب وش السلندر 

طبعا احنا جيبين طقم جوانات بس بصراحة مش تمام انا هاشترى جوان وش سلندر لوحدة عشان اللى بيجى فى الطقم مش برتحلة بصراحة 

وعشان نقفل الجوان تمام لازم نديلة جملكة عشان المياة ومش عاوز افكرك ان سطح البلوك من فوق بيبرق وما فيش اى رواسب لجوان وش السلندر القديم يعنى معمول بصنفرة ناعمة
خلاص ادينا جملكة للجوان وللبلوك واتاكدنا ان جميع قلاووظات المسماير مفيهاش جاز ومتنفضة بالهواء تعالى نحرر الـ 4 بساتم يعنى نخليهم مش فى النقطة الميتة العليا ونركب الوش بتعنا ونربط المسامير رباط خفيف ولما نبدا نقرط نقرط من المنتصف وللخارج بشكل حرف اكس 

ممكن نركب الفولام على الكرنك بعد لما نركب اويل سيل الكرنك الخلفى ومش لازم تديلة جملكة بس تركبة صح اوعى يكون مش راكب كويس لحسن يجيب زيت ولو عاوز تديلة جملكة يبقى من على المحيط الخارجى بتاعة طبعا هتحط الخابور مكانة وتركب الفولام وتربط مسامير الكرنك برباط من نااااااااااااااار بنفس طريق الفك اللى هى نص السبيكة القديمه وممنوع منعا باتا تلف الكرنك الا لما نركب سير الكاتينة 

حط الاسطوانة وبعدين الدسك وبنظبط مركزية الاسطوانة بعامود دركت معرفش بقى هاتجيبة عندك ازاى 

ونتقابل فى الفقرة الجاية بتقفيل الكاتينة 

نبدا بتركيب طنبورة الكرنك الامامى بعد تركيب اويل سيل الكرنك الامامى هانحط الخابور مكانة ونركب الطنبورة ونربط المسمار بتعها ونربط بلية الشداد بس منحرقش عليها 

هانظبط العلامة بتاعة الطنبورة على جسم البلوك عبارة عن شرط ببدن الطنبورة تقابل شرط على البلوك ونفس الطريقة زنبة ترس الكامة تقابل زنبة معدنية على الصاجة الخلفية لوش التقسيمة مدببة لاسفل ، نركب السير ونشدة عن طريق بلية الشداد ونختبر شد سير الكاتينة بالايد يكون عامل سوستة ولا مشدود اوى ولا مرخى اوى وممكن نقفل الوش البلاستيك الاصفر ،،، طب ما تيجى نسقط الاسبراتير بالمرة طالما احنا محررين البستم رقم 1 والطريقة سهلة اوى

نركب ترس الاسبراتير او اسمة ترس طلمبة الزيت والترس دة بيستمد حركتة الخارجية من عامود الكامات ومن الداخل يوجد مشرشر بيلفف طلمبة الزيت وعامود الاسبراتير 

نجيب وش الاسبراتير ونحدد سلكة البوجية رقم واحد هتلاقيها مكتوبة على وش الاسبراتير (1 ) ونسقط الاسبراتير على الوضع دة واتجاة الشاكوش على سلكة البوجية رقم 1 ونربط المسمار المثبت للاسبراتير بس رباط بالايد مش بالمفتاح

تقفيل ادوات التغذية
طبعا اى حاجة بتركب فى البلوك بتتقفل بجملكة
هانركب طلمبة المياة
طلمبة البنزين
الاسبراتير خلاص ركبناة
المانيفولد
الكربراتير
وممكن ندور المكنة على الارض دلوقتى للإختبار و للتلين بعد تركيب دورة المياة ردياتير وخراطيم السحب والطرد 

وطبعا المارش بس هانشيلة تانى اما نيجى نسقط المكنة فى الحوض 

مش لازم نركب الشكمان فى عملية التليين ، واحنا بنليين لازم نختار اوقات الليل ووش العربية للبحرى ، اثناء التليين لازم جركن مية جنبك وكل شوية تزود الردياتير
بنليين ببنزين 80 افضل
فى بداية التليين ندور ربع ساعة ونبطل نص ساعة لغاية اما الموتور يدور بانتظام وسلاسة
لو عملنا عمرة كاملة مش اقل من صفحتين بنزين للتلين على الواقف ، وبعدها مشوار على طريق مفتوح ليلا مش اقل من 200 كم 

نظبط تاكيهات قبل التدوير 

نعيد رباط وش السلندر بعد 1000 كم مع ظبط تاكيهات 

 فى النهاية اتمنى تكونوا استفدتم واى سؤال تحت امركم

الموضوع منقول من أحد السادة الأعضاء ،،،،

 ----------------------------------------------------

وده فيديو للأستاذ أدهم حسام عامل فيه عمره كاملة للموتور بنفسه
بتاع عربيته فيات 127


عمرة كاملة للموتور

الجزء الأول





الجزء الثانى






----------------------------------------------------

يارب يكون الموضوع عجبكم ...

مع تحياتى





الاثنين، 21 مارس 2016

طريقة تغيير فرش السقف

بسم الله الرحمن الرحيم

الناهردة هشرحلكم طريقة فك وتغيير وتركيب فرش السقف للعربية

أولاً الخامات المطلوبة :
- 2 متر جلد .. اللون على حسب الاختيار
- علبة غراء سريع نص كيلو ( كله ) 
- فرشاة دهان صغيرة
- مقص كبير

ثانياً مرحلة التنفيذ :
أول حاجة هنبدأ بيها اننا نفصل الجلد الجديد  عشان بعد ما نفك القديم نقدر نركب على طول .. التفصيل هيبقى عبارة عن عمل ثنيات ( مجارى ) للأسياخ عشان تمسك الجلد فى السقف .. هناخد المقاسات بطريقتين .. اول حاجه ممكن ناخد المقاس بالمتر قبل مانفك الفرش القديم ونعلم على ظهر الجلد الجديد وثانى طريقة اننا ممكن بعد ما نفك الجلد القديم نعلم بيه المقاس عالجديد ( فى حالة لو الجلد القديم مشدود صح ) .. بالنسبالى خدت المقاسات من العربية افضل لإن الجلد القديم كان مقاسه مش مظبوط والسقف كان بيهبط على دماغى مع الهواء عالطريق .. وللأسف عشان معنديش ماكينة خياطة .. خدت الجلد وروحت بيه لأقرب ترزى خليته فصلى الجلد بالمقاسات اللى اديتهاله .
ثانى حاجة بعد ما خلصنا من تفصيل الجلد الجديد هنبدأ نفك البربريز الأمامى والخلفى وطريقة الفك سهله جداً هنحتاج فيها مفك عادة ونبدأ نخرج الجوان الكاوتش من جوه العربية واحدة واحدة ونزق الازاز لبره لحد مايخرج كله ، بعد كدة هنبدأ نفك كاوتش الأبواب لحد النص تقريباً ومننساش نفك مقابض الاجناب ومراية الصالون والشماسات ، الخطوة اللى بعديها هنفك فرش السقف الملزوق بحروف الأبواب وحروف الزجاج الامامى والخلفى ، بعد كدة هنبدأ نسحب الاسياخ الموجودة فى فرش السقف ونخلعها من الجلد بالكامل وعددهم تقريباً 5 اسياخ ، وبعد كده هنبدأ نركب الاسياخ فى الجلد الجديد تانى ونعلقهم فى السقف بنفس الطريقة اللى فكيناهم بيها ، بعد كده هنبدأ ندهن حروف الابواب وحروف البربريز الامامى والخلفى بالغراء السريع ونسيبها حوالى 15 : 20 دقيقة وبعد كده هنبدأ نشد الجلد عالحروف ونلزقه والزيادات طبعاً هنبقى نقصها فى الأخر خالص .. وفى النهاية هنركب البربريز الامامى والخلفى تانى وده هيبقى عن طريق حبل دوبار قماش ( حبل غسيل ) ويفضل الحبل يكون من القماش افضل من البلاستيك عشان يكون ناعم عالكاوتش بتاع البربريز وميقطعوش .. الحبل هيتلف حوالين الكاوتش كله ونبدأ نحط البربريز فى مكانه ونبدأ نشد الحبل من جوه العربية وحد تانى يكون واقف معاك بره يكبس بإيده على الكاوتش واحده واحده وانت بتسحب الحبل عشان تدخل الشفف الكاوتش اللى خرجناها بالمفك واحنا بنفكه فى الاول خالص  لحد ما الازاز يركب كله تمام .. وطبعأ عشان اكمل الجميل معاكم .. الشرح ده كله انا صورته صوت وصورة بالفيديو عشان ابسط الطريقة لكل الناس .. ومبروك مقدماً

فيديو الشرح

 

----------------------------------------------------

يارب يكون الموضوع عجبكم ...

مع تحياتى


الاثنين، 29 فبراير 2016

الأوراق المطلوبة لإتمام إجراءات الترخيص والتجديد ونقل الملكية ورخص القيادة أول مرة

بسم الله الرحمن الرحيم


كتير مننا بيكون عايز يعمل رخصة لأول مرة ومش عارف ايه الاجراءات ولا الاوراق المطلوبة ايه وساعة لما بيروح المرور بيبقى تايه ومش عارف يروح فين ولا يعمل ايه .. وناس تانية بتكون شارية العربية لسه جديدة زيرو وعايزة تنقل ملكية او عايزة ترخص العربية لأول مرة .. وفى اللى رخصتهم انتهت وعايز يروح يجدد ومش فاكر هيعمل ايه او ايه الإجراءات المطلوبة .. خلاصة الكلام .. الموضوع ده ان شاء الله هيكون شامل كل التفاصيل اللى ممكن تحتاجوها فى المرور .

-----------------------------------------------

أولاً : الأوراق المطلوبة لإستخراج رخصة قيادة لأول مرة 


قبل التوجه للإدارة المرور التابع لها عليك اولا اتباع الأجراءات الآتيه :

أولاً : تجهيز الأتى :
  • تجهيز 2 صور شخصية حديثه
  • توجه بالصور والبطاقة إلى أى مستشفى أو مستوصف طبى واستخرج شهادة باطنة وشهادة نظر + فصيلة الدم

ثانياً : التوجه لإدارة المرور التابع لها مع تجهيز الأوراق التالية :
  • شهادة إتمام المرحلة الدراسية ( ابتدائية - اعدادية - ثانوية - دبلوم - محو اميه كمبيوتر )
  • بطاقة الرقم القومى أو جواز سفر رقم قومى أصل + 2 صورة
  • شهادة باطنى + نظر + فصيلة الدم
  • ملف ورقى + نموذج 256 مرور ( من الخزينة )
  • عدد ( 2 ) صورة شخصية
  • شراء ورقة اختبار اشارات كمبيوتر قبل الإختبار ( من الخزينة )


ثانياً : الأوراق المطلوبة لتجديد رخصة قيادة خاصة أو دراجة نارية

  • الرخصة القديمة
  • بطاقة الرقم القومى أو جواز سفر رقم قومى
  •  نموذج 256 مرور + شهادة مخالفات
  •  شهادة باطنى + نظر + فصيلة الدم
  • عدد ( 1 ) صورة شخصية


 ثالثاً : اجراءات ترخيص السيارة الجديدة
  • الإفراج الجمركى ويتم الاستعلام عنه من موظف الإفراجات أو تحويله من الإدارة العامة لمرور القاهرة ( وحدة سكرتارية ) فى حالة عدم وروده أو شهادة بيانات مؤمنة إذا كان الإفراج مجمع لأكثر من سيارة 
  • خطاب المرور الصادر من التاجر إذا كانت المركبة مشتراه من أحد معارض السيارات وأن يكون معتمد بخاتم شعار الجمهورية
  • فحص السيارة فنياً بعد شراء نموذج الفحص من خزينة الوحدة
  • التأمين على المركبة تأميناً إجبارياً لدى إحدى شركات التأمين ( مصر للتأمين - رويال - إيماج - البيت المصرى السعودى - وثاق - المشرق - أروب ) ويراعى أن يكون التأمين بعدد السنوات التى ترغب ترخيصها ( عام - عامين - ثلاث أعوام )
  • سداد الضرائب المقررة لخزينة الوحدة عقب تقديرها من الموظف المختص
  • نموذج 251 مرور ويتم شراءه من خزينة الوحدة ويكون عدد النماذج بعدد السنوات الراغب فى ترخيصها 
  • تقدم الأوراق للموظف المختص مصحوبة بعدد واحد دوسيه ورقى + 2 صورة بطاقة رقم قومى أو جواز سفر سارى المفعول الإلكترونى الجديد


رابعاً : إجراءات نقل الملكية
  • عقد البيع الموثق بالشهر العقارى + رخصة التسيير سارية المفعول أو شهادة البيانات المؤمنة الصادرة من المرخص بها المركبة صلاحيتها لمدة ثلاثون يوماً
  • شهادة براءة الذمة ( شهادة المخالفات ) الصادرة من نيابة المرور القادم منه المركبة صلاحيتها لمدة ثلاثون يوماً
  • فحص السيارة على نموذج الفحص الفنى ويتم شراءه من خزينة الوحدة وصلاحيتها لمدة ثلاثون يوماً
  • نموذج 251 مرور ويتم شراءه من خزينة الوحدة ويكون عدد النماذج بعدد السنوات الراغب فى ترخيصها 
  • ملحق وثيقة التأمين الإجبارى ويتم عمله بأحد شركات التأمين ( مصر للتأمين - رويال - إيماج - البيت المصرى السعودى - وثاق - المشرق - أروب ) بإسم المالك الجديد وبدون رقم لوحات معدنية وذلك فى حالة إذا كانت الرخصة سارية المفعول ويراعى أن مدة التأمين تكون بعدد سنوات الراغب الترخيص بها ( عام - عامين - ثلاث أعوام )
  • تقديم الأوراق للموظف المختص مصحوبة بعدد واحد دوسيه ورقى + 2 صورة بطاقة رقم قومى أو جواز سفر سارى المفعول الإلكترونى الجديد

ملحوظة هامة
إذا كان المتقدم وكيلاً من المالك بموجب توكيل رسمى ضرورة إحضار أصل التوكيل وصورة ضوئية من بطاقة المالك الرقم القومى


خامساً : إجراءات تجديد المركبة
  • شهادة براءة الذمة ( شهادة المخالفات ) الصادرة من نيابة المرور صلاحيتها لمدة ثلاثون يوماً
  • نموذج 251 مرور ويتم شراءه من خزينة الوحدة ويكون عدد النماذج بعدد السنوات الراغب فى ترخيصها 
  • التأمين على المركبة تأميناً إجبارياً لدى إحدى شركات التأمين ( مصر للتأمين - رويال - إيماج - البيت المصرى السعودى - وثاق - المشرق - أروب ) ويراعى أن يكون التأمين بعدد السنوات التى ترغب ترخيصها ( عام - عامين - ثلاث أعوام )
  • فحص السيارة فنياً إذا مضى 3 سنوات على تاريخ أخر فحص فنى
  • سداد الضريبة المقررة بخزينة الوحدة عقب تقديرها من الموظف المختص 

ملحوظة
مواعيد العمل يوميا من الساعة الثامنة صباحاً وحتى الساعة الثامنة مساء عدا يوم الخميس فينتهي العمل في الثانية مساء

----------------------------------------------------

يارب يكون الموضوع عجبكم ...

مع تحياتى


الاثنين، 8 فبراير 2016

تعديل فانوس فيات 128 الخلفى الي لمبات ليد

بسم الله الرحمن الرحيم


الاخوه الكرام اصدقائي الاعزاء مالكي 128 موعدنا اليوم مع تعديل الفانوس الخلفى للعربية من لمبات عادية الى لمبات ليد بأى شكل احنا عوزينه و بتكلفه قليله جدا مقانه بالاسعار فى السوق

الموضوع للاخوه المبتدئين لذلك انا استخدمت مواد بدائيه جدا علشان تبقي متوفره و رخيصه فى نفس الوقت و اللى حابب يغير لحاجه افضل له حريه الاختيار

 

الخميس، 4 فبراير 2016

حلول الأعطال الشائعة والمشاكل اللى بتعطل عربيتك

بسم الله الرحمن الرحيم

  
شوية معلومات مهمة عالسريع هتستفاد منها مع حملة إفهم عربيتك

 
 

جميع الحقوق محفوظة لــ Monster Fiat 128 2016 ©